د الجزیرې خبري رسنۍ راپور ورکړی، چې په تېرو ۲۴ ساعتونو کې د غزې تړانګې په مرکز کې ۶۶ تنه فلسطینیان د اسرائیلو په بریدونو کې وژل شوي دي.
الجزیرې زیاته کړې، چې په یاده موده کې د اسرائیلو لخوا په لسګونو فلسطینیان ټپیان شوي هم دي، چې د ډیرو حالت نازک ښودل شوی دی.
د فلسطین د روغتیا مسولین وایي، چې پر غزې تړانګه د اسرائیلو د یرغل له پیله تر دې مهال ۳۶ زره ۵۵۰ تنه فسطنیان وژل شوي او ۸۲ زره ۹۵۹ تنه نور ټپیان شوي دي، چې زیاته برخه یې ښځې او ماشومان دي.
د یو شمېر نړۍوالو رسنیو راپورونه ښیي، چې د اسرائیلو د یرغل سره سم په میلیونونو فلسطینیان د ځان د خوندی ساتلو په موخه د جګړې له سیمې نورو ځایونو ته ګډوال شوی دي.
اسرائیلو نږدې ټوله غزه په کنډواله بدله کړې او په دغه جګړه کې د میلیاردونو ډالرو په ارزښت یي تاسیسات او د هستوګنې ځایونه له منځه وړي دي.
د تیرو اته میاشتو را پدیخوا په غزه کې د اسرائیل او حماس ترمنځ جګړه روانه ده، په دغه موده کې د یو شمېر هېوادونو لخوا د جګړې د ختمدېدو او اوربند په موخه زیاتې هڅې شوي دي، خو لا هم دغو هڅو کومه پایله نه ده ورکړې.