چهار شنبه/ د وري ۱۵ مه: د فلسطین د عامې روغتیا وزارت د یوې اعلامیې په خپرولو سره ویلي، چې د اسرائیلو هوایي ځواکونو په غزه کې د بهرنیو مرسته رسوونکو یو زرهي موټر په نښه کړی او برید یې پرې کړی دی، په برید کې څلور بهرني مرسته رسوونکي او یو فلسطینی، چې د دوی موټر چلوونکی او ژباړن و، وژل شوی دی.
په اعلامیه کې زیاته شوې، چې دغه برید د غزې اړوند د “دیرالبلح” په لودیځ کې د یوه امریکایي خیریه بنسټ، چې (نړۍواله مرکزي طعام خونه) نومېږي، د دوی بهرني مرسته رسوونکو پر زرهي موټر شوی، چې پنځه تنه پکې وژل شوي دي، څلور تنه یې بهرنیان او یو تن فليسطينی وګړی دی، د وژل شويو اشخاصو جسدونه د “الاقصی شهیدانو” عامه روغتون ته ور وړل شوي دي.
د فلسطیني سرچینو په حواله ویل شوي، چې په وژل شويو بهرنیو وګړو کې یو د برېټانیا، یو د استرالیا او یو د پولنډ هېواد اوسېدونکي و، خو څلورم شخص معلوم نه دی، چې د کوم هېواد اوسېدونکی و.
به دغه برید کې د دوی ژباړن او موټرچلوونکی فلسطینی وګړی “سیف عصام ابوطاها” هم وژل شوی دی.
بلخوا د یاد بنسټ د یوې اعلامې په خپرولو سره ویلي، چې وژل شوي څلور تنه بهرني مرسته رسوونکي د دوی د سازمان کارکوونکي و او د دوی وژنه یې زړه بوږنوونکی عمل ګڼلی دی او دغه برید یې د انسانیت خلاف عمل بللی او غندلی دی.
یاد سازمان همدا راز ویلي، چې د یادې پېښې په اړه به نور معلومات هم تر څیړنو وروسته خپاره کړي.
“نړۍاله مرکزي طعام خونې” سازمان یو خیریه بنسټ دی، چې د خوړو د خوندیتوب په موخه کار کوي او په غزه کې بې ځایو شویو کورنیو ته مرستې رسوي، د دغه سازمانمرکزي دفتر د امریکا په پلازمېنه واشنګټن دی.