د کاپیسا ولایت د اطلاعاتو او فرهنګ ریاست د ځوانانو چارو د آمریت په هڅو د دغه ولایت په نجراب ولسوالۍ کې د ۱۴۰۴ه.ش کال د ثور اتمه چې په هېواد کې د پخواني کمیونیستي رژیم پر وړاندې د مجاهدینو د بریا ۳۳مې کالیزې سره برابره ده، ولمانځل شوه.
د کاپیسا ولایت د اطلاعاتو او کلتور ریاست د معلوماتو له مخې، په دې لمانځغونډه کې د دولتي ادارو مسؤولينو، قومي مشرانو، علماوو، د مدني ټولنو استازو، ځوانانو او ګڼ شمېر نورو خلکو ګډون کړی و.
ويناوالو په همدې مناسبت جوړه شوې غونډه کې د خبرو پر مهال د ثور اتمه د افغانستان د آزادۍ، خپلواکۍ او د ولس د ژغورنې د ورځې په توګه ياده کړې او د مجاهدينو نه ستړې کېدونکې مبارزې او قربانۍ يې ستايلې دي.
دغه راز په یاده غونډه کې ویل شوي چې، د شوروي اتحاد پر وړاندې د افغان مجاهدينو اتلولۍ نړۍ ته دا وښودله چې افغانان هېڅکله د زور او تېري پر وړاندې نه تسليمېږي.
ګډونوالو په یاده غونډه کې له نوي ځوان نسل غوښتنه کړې چې د مجاهدينو له قربانيو الهام واخلي او د هېواد د بيا رغونې، پرمختګ او سوکالۍ لپاره ګډ کار وکړي.