د احمد مسعود په مشرۍ د خیالي مقاومت ډلې له خوا د سیاسي دفتر نوي نښان پر رسنیو خپور شوی؛ په دغه نښان کې د پرځېدلي جمهوریت د درې رنګه بیرغ ترڅنګ، د مقاومت ډلې بیرغ هم ځای پر ځای شوی او یوازې یوه ملي ژبه پکې کارول شوې. دا یوازې یو سمبولیک بدلون نه دی، بلکې د دغه ډلې پلویانو ته څرګند سیاسي پیغام لري.
نښانونه په سیاست کې د فکر، هویت او راتلونکې تګلارې استازیتوب کوي. کله چې یو جریان خپل سیاسي نښان اعلانوي، په حقیقت کې هڅه کوي خپل اصلي دریځ اعلان کړي. د مقاومت ډلې نوی نښان هم همداسې دی؛ ظاهراً ساده معلومېږي، خو په باطن کې له معناوو او سیاسي پیغامونو ډک دی.
په دې نوي اعلان شوي نښان کې د بیرغونو دوه ګونی شتون او د پښتو ژبې نشتوالی د پام وړ ټکي دي. پښتو د افغانستان ملي ژبه او د ملي هویت یو اساسي رکن دی. د داسې ژبې له پامه غورځول، چې د دې خاورې د نیم نفوس ژبه وي، تصادفي نه شي کېدای. دا کړنه په عملي ډول دا پیغام ورکوي چې یاد جریان ځان د ټول افغانستان استازی نه، بلکې د یوې ځانګړې سیاسي او ژبنۍ حوزې وارث ګڼي او دا دریځ په مقاومت ډله کې د پښتنو غړو او پلویانو د اندیښنې سبب ګرځېدلی دی.
بل مهم اړخ دا دی چې په نښان کې د پرځېدلي جمهوریت د بیرغ ترڅنګ د رباني د دورې بیرغ، چې اوس د مقاومت ډلې بیرغ هم دی، ځای پر ځای شوی دی. دا دوه بیرغه دوه بېلابېل روایتونه تمثیلوي؛ درې رنګه بیرغ له نورو مخالفینو سره د ګډ تشکل نښه ده، همدا راز د رباني بیرغ(چې اوس د مقاومت ډلې بیرغ دی) د تنظیمي واکمنۍ، انحصاري سیاست او کورنیو شخړو خاطرې له ځان سره لري. د دواړو یوځای کول دا ښيي چې مقاومت ډله یو خوا غواړي ځان نورو مخالفینو ته نږدې وښیي او بل خوا لا هم دغه ډله د تنظیمي تفکر له سیوري نه ده وتلې او تر ملي(!) شعار لاندې زاړه سمبولونه بیا تولیدوي.
سره له دې ټولو نښو، ځینې افغانان لا هم د احمد مسعود ملاتړ کوي او هغه د نجات رهبر بولي. دا ملاتړ پر اسلامي او ملي فکر او سیاسي منطق نه دی ولاړ، بلکې د احساساتي پرېکړو پایله ده. د سیاسي دفتر دغه نښان وښوده چې احمد مسعود او د هغه نږدې کړۍ د پښتنو او نورو قومونو له سیاسي نقش سره ژوره فاصله لري. که څه هم دا عناد تر اوسه په ښکاره ډول نه دی اعلان شوی، خو په نښان، ژبه، اړیکو او سیاسي چلند کې یې نښې څرګندې دي.
تاریخي شواهدو ښودلې چې داسې جریانونه خپل اصلي نیت هغه وخت ښکاره کوي چې قدرت ته ورسېږي، نه هغه مهال چې د ملاتړ د جلبولو اړتیا ولري؛ سره له دې چې مقاومت ډلې له وخت وړاندې خپله اصلي څېره روښانه کړه، خو بیا هم یو شمېر ړانده ملاتړي د دغه ډلې په دروغجن شعار تېروتلي او مسیر نه ترې جلا کوي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.