ماليې وزارت د افغان حکومت د مشرتابه د ځانګړي شفقت پر بنسټ، په هېواد کې د مالیاتي اصلاحاتو په لړ کې د یو شمېر حقیقي، حکمي او معنوي اشخاصو لپاره د مالیاتو نوې تخفیفي کڅوړه اعلان کړې ده.
د نوې پرېکړې له مخې، له کانونو پرته به د ټولو معنوي او حکمي اشخاصو، روغتونونو او روغتیايي مرکزونو پر عایداتو لس سلنه مالیه وضع کېږي، په داسې حال کې چې تر دې وړاندې د مالیې کچه شل سلنه وه.
په همدې حال کې، هغه حقیقي اشخاص چې کلنی عاید یې تر ۱۲۰ زره افغانیو پورې وي، له مالیې معاف شوي دي. مخکې د مالیې معافیت حد ۶۰ زره افغانۍ ټاکل شوی و.
همداراز، د ملکیتونو د لېږد مالیه هم له یو سلنې څخه ۰.۵ سلنې ته راکمه شوې ده. د دغو بدلونونو له مخې، په ځینو برخو کې د مالیاتي تخفیف کچه تر ۵۰ سلنې پورې رسېږي، چې موخه یې د اقتصادي فعالیتونو هڅول او پر مالیه ورکوونکو د مالي بار کمول ښودل کېږي.