تسنیم خبري اژانس راپور ورکړی، چې شمالي کوریا د جنوبي کوریا لپاره د امریکا د احتمالي وسلو پلور او پر پیونګیانګ د بشري حقونو د سرغړونو د مستندسازۍ لپاره د میلیونونو ډالرو د ځانګړي کولو پلان په کلکه غندلی او خبرداری یې ورکړی، چې د واشنګټن دغو اقداماتو ته به په «سمدستي او قوي» غبرګون ځواب ووایي.
د شمالي کوریا د بهرنیو چارو وزارت ویاند ویلي، د امریکا له لوري جنوبي کوریا ته د ۱۰۳ هوايي توغندیو، د AIM-9X په نوم او اړوندو تجهیزاتو د احتمالي پلور منظوري د پیونګیانګ پر وړاندې د واشنګټن د «دښمنانه سیاست» د دوام څرګندونه کوي. نوموړي دغه اقدام د شمالي کوریا د امنیت پر وړاندې نوی ګواښ بللی دی.
د شمالي کوریا حکومت همدارنګه د امریکا هغه طرحه هم غندلې، چې له مخې یې د دغه هېواد د بشري حقونو د ادعا شویو سرغړونو د مستندسازۍ او د شمالي کوریا د تبلیغاتو پر وړاندې د مبارزې لپاره تر ۲.۹۶ میلیونه ډالرو پورې بودجه ځانګړې کېږي.
د پیونګیانګ د بهرنیو چارو وزارت ویاند ټینګار کړی، چې شمالي کوریا به د واشنګټن هر ډول خصمانه اقدام له نږدې وڅاري او د خپلو امنیتي ګټو پر وړاندې د ګواښونو په صورت کې به «سمدستي او ځواکمن اقدامات» ترسره کړي.