هندوکشغږ ته له پاور بانک(تش په نوم آزادۍ) جبهې څخه باخبره سرچینو ويلي، چې تېره ورځ مازديګر مهال د پاکستان پوځي رژیم او پاور بانک جبهې د پاکستان پلوه نيابتي او وفادارو کسانو له خوا، هغه غولېدلي کسان چې د نورستان له وروستۍ نښتې څخه تښتېدلي وو او هغه غړي چې له جګړې کولو یې انکار کړی و، نيول شوي او نظارت خونو ته یې انتقال کړي. کوم کسان چې زخميان دي او له نورستان څخه يې پاکستان ته اړولي دي، هغوي هم د پوځي رژیم له لوري د بنديانو په شکل تداوي کيږي.
د ترلاسه شویو اطلاعاتو له مخې، له فرضي کرښې هغې غاړې ته د پاور بانک جبهې نيول شويو غړو تېرې څو ورځې له دې امله غوغا جوړه کړې وه، چې د دوی په وينا دوکه ورسره شوې ده. د شر او فساد يادو غړو له آی ايس آی او پاور بانک جبهې څخه غوښتنه کړې وه چې اجازه ورکړي، چې افغانستان ته لاړ شي او يا په هغه ژمنو او غوښتنو عمل وکړي، چې له مخې یې د ايران څخه پاکستان ته راوړل شوي وو او داسې ورته ويل شوي وو چې وروسته نورو بهرنيو هېوادونو ته انتقالېږي.
معتبرو سرچینو هندوکشغږ ته همدا راز منلې، چې نظارت خونو ته د کامدېش له نښتې د تښتېدلو کسانو انتقال د شر او فساد د غړو او پاکستاني استخباراتو ترمنځ سخته بې باوري رامنځته کړې ده او د پاور بانک جبهې پاتې غړي د شر او فساد له لیکو او پوځي رژیم له کمپونو څخه د تېښتې په فکر کې دي.
د يادونې وړ ده، چې په چترال کې د تش په نوم آزادۍ جبهې د منځنۍ کچې مسؤلينو ترمنځ هم اختلافاتو زور اخیستی او په کامدېش کې د زياتو تلفاتو د ورکړې له امله په فضل ربي خنجاني تور پورې شوی، چې دا تلفات یې د یوې معاملې له مخې ورکړي دي.