افغان ولس څو لسیزې د جګړو په اور کې سوځل شوی او هېواد یې ویران شوی دی، خو اوس چې له دې اور څخه تازه راوتلی، د عفوې، سولې او آرامۍ په فضاء کې یې د آرام ساه اخیستې ده، سمدستي د اسلام، هېواد او ولس مشترکو دښمنانو تر نویو نومونو لاندې، د شریرو استخباراتي کړیو په ملاتړ د ناارامۍ هڅې پیل کړې دي. دوی چې ځان د ولس د آزادۍ مدافعین بولي، په حقیقت کې د پردیو د اجنډاوو پر مخ وړونکي دي. د هغو جبهو او ډلو حقیقت په دې وروستیو کې خورا روښانه شوی دی چې د بهرنیو کړیو په مرسته د افغانستان په ضد جګړه کوي او د افغانانو د وینو په بدل کې د نورو ګټې تحقق کوي.
مخالفې ډلې د افغان ولس د غوښتنو استازیتوب نه کوي، بلکې د هغو هېوادونو د ګټو استازیتوب کوي، چې افغانستان یې د خپلو سیالیو د ډګر په توګه ټاکلی دی. یو شمېر استخباراتي سازمانونه له لسیزو راهیسې د خپلې جغرافیې د ثبات په بهانه د افغانستان په داخلي چارو کې مداخله کوي، دا مداخلې ځینې وخت مستقیمې او ځینې وخت غیر مستقیمې وي، دغه لاسوهنې د دې لامل شوې دي، چې یوازینی زیان یې افغانانو او افغانستان ته ورسېږي، خو بهرني جهتونه خپلې موخې ترلاسه کړي. د نورستان په کامدېش کې د مخالفو ډلو او خبیث مثلث وروستۍ ناکامه هڅه یې څرګند مثال دی، چې د ټولو اصلي څېره یې په ښه ډول بربنډه کړل.
د مخالفو ډلو تر شا هماغه خلک دي چې د پرځېدلي جمهوریت پر مهال امریکا د خپل اشغال د دوام لپاره کارولي وو، هره ورځ به یې مستقل ګوندونه او ډلې ورته جوړولې، حتی ولسمشري هم داسې حالت ته رسېدلې وه، چې په یوه کس یې نه اداره کوله، بلکې هر چا ته یې یو بل څوک پیدا کړی و، په نویو نومونو به یې انشعابونه رامنځته کول او د نویو ډلو جوړولو بازار ګرم و؛ هر یوه هڅه کول چې تر نورو یې نوم لوړ وي، خو د هېواد لپاره یې هیڅ نه ګټه لرل، نه یې پلان او برنامه درلوده او نه یې په عملي ډګر کې څه لرل.
پخوانیو جنګسالارانو ته چې اوس هم د مخالفت په ډګر کې ولاړ دي، دغه ډګر د شهرت، موقف او ځان ښودنې میدان ګرځېدلی، هر یو یې هڅه کوي چې تر نورو لوړ ښکاره شي او تر نورو ډېر ځان پردیو ته وفادار وښيي؛ یاسین ضیاء په دغه ډګر کې تر نورو ژر را مخته شو، د غریبو افغانانو اولادونه یې تېر ایستل، د آی ایس آی په واک کې یې ورکړل او له سنجش پرته یې د مخالفینو په عنوان د پردیو ګټو لپاره قربانیان کړل. دا دومره ښکاره شرمندګي وه، چې په دې لویه خطا یې حتی عطا محمد نور هم اعتراف وکړ او د پردیو د نیابت کلک مخالفت یې وکړ.
ولس ته هر څه روښانه شوي دي او د مخالفینو د دغه هېواد ضد فعالیتونو په وړاندې یې سخت غبرګونونه ښودلي دي. همدا جنګ سالاران او د پردیو د اشغال پلویان دي چې څو لسیزې یې افغانستان د پردیو جګړو په اور کې سوځولی دی، خو لا هم هڅه کوي، چې دغه بدبختي بیا هېواد ته راوړي او په بدل کې یې شخصي جېبونه ډک کړي، خو افغان ولس نور نباید د دې جبهو په نومونو دوکه شي او د پردیو موخو لپاره د خپل هېواد په ضد ودرېږي.
افغان ولس باید تر مقاومت، آزادۍ او نورو نومونو لاندې د روانو لوبو تر شا پراته حقایق درک کړي. هغه جګړه چې د افغانانو په نوم، د پردیو په پیسو او د پردیو موخو لپاره ترسره کېږي، هیڅکله د ولس لپاره نه ده. افغانان نور نه غواړي چې د نورو هېوادونو د سیالیو، استخباراتي موخو او شومو اجنډاوو لپاره خپل اولادونه قرباني کړي او د هغو جبهو او څېرو ملاتړ وکړي، چې هر ځل د پردیو له دروازې څخه په نوي نوم او نوې دعوې راڅرګندېږي. اوس چې د جګړې شعار هر څومره ښکلی او جذاب وي، خو چې مشروع نه وي او موخه یې د افغانانو وینې تویېدل او د پردیو د اهدافو تحقق وي، نو مؤمن ولس یې باید رد کړي او اجازه ور نه کړي چې د افغانستان خاوره یو ځل بیا د نورو د پټو جګړو میدان وګرځي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.