څو ورځې وړاندې د هندوکشغږ له خوا د آزادۍ جبهې د مرستيال عبدالستار حسيني او عيسی محمدي يو مستند غږيز کليپ نشر شو چې د آزادي او مقاومت جبهې تر منځ یې د آيډيولوژيک اختلاف څخه پرده پورته کړه چې يوه مهمه برخه يې د آزادي جبهې سره نږدې دوه نیم کاله د عيسی محمدي پټه رابطه وه او په دې کليپونو کې دا هم په ډاګه شوه چې آزادي جبهه په دې هڅه کې ده چې د مقاومت جبهې کسان جلب او جذب کړي.
تازه هندوکشغږ ته سرچينو ويلي چې آزادي جبهې له ډير وخت راهيسې د مقاومت جبهې د غړو، جنګياليو او ځينو ډيپوګانو په اړه د طالبانو استخباراتو ته معلومات ورکړي دي.
د سرچينو له قوله، آزادي جبهې د خپل مشهور قومندان او د شمال غرب زون د مسؤول جنرال فايق په توسط طالبانو ته د مقاومت جبهې د افرادو لستونه ورکړي دي چې له امله يې د طالبانو استخباراتو د مقاومت جبهې ځينې مهم کسان نيولي دي.
د سرچينو د معلوماتو په اساس د نقيب الله فايق او حسيني لخوا د طرحه شوي پلان په اساس دوی د مقاومت جبهې ډيری د وسلو او مهماتو ډيپوګانو په اړه هم طالبانو ته معلومات ورکړي او په لاس يې ورکړي دي چې له امله يې د مقاومت جبهې فعاليتونه د پام وړ تضعيف شوي هم دي.
نقيب الله فايق د مقاومت جبهې او همدارنګه د عبدالرشيد دوستم له سختو منتقيدنو څخه دی او دوستم ته د کميشن کار خطاب کوي.
دا لومړی ځل نه دی چې دا ډول معلومات له يادو جبهو څخه درز کوي، په تيرو وختونو کې دواړو لورو يو پر بل دا ډول ډير تورونه پورې کړي دي، د هندوکشغږ لخوا د تازه نشر شوي کليپ څخه هم دا معلومېږي چې آزادي جبهې په مقاومت جبهه کې ژور نفوذ کړی دی او له منځه يې معلومات راټولوي چې د مختلفو پټو تعاملاتو په نتيجه کې يې طالبانو ته ورکوي؛ ويل کېږي چې عيسی محمدي هم په تيرو دوه نيمو کلونو کې آزادي جبهې ته جاسوسي کوله او پټ معلومات يې ورکول.
سرچينه زیاتوي؛ جنرال فائق په شمالي ولايتونو کې خپل ځينې کسان له طالبانو سره په اړيکه کې کړي دي تر څو د مقاومت جبهې په اړه طالبانو ته معلومات ورکړي، يو له دې کسانو د ډاکتر وکيل په نوم کس دی چې اوس په ايران کې اوسېږي خو د ځينو مهمو طالبانو سره د خپلوۍ او نورو تعاملاتو په اساس طالبانو ته د مقاومت جبهې په اړه مهم راپورونه ورکوي. ډاکټر وکیل د آزادۍ جبهې مشر یاسین ضیاء ته له نږدې او معتمدو کسانو څخه دی.
د تحليلګرانو په باور، د مقاومت جبهې او آزادي جبهې تر منځ د دې اختلافاتو ريښې هغو غربي هيوادونو ته ورګرځي چې دوی يې حمايه کوي، انګلستان او په امريکا کې ځينې کړۍ د آزادي جبهې يو له مستقيمو تمويلوونکو څخه دي چې هغوی په دې دليل نه غواړي مقاومت جبهه ډير پرمختګ وکړي چې دوی فرانسې او د امريکا ځينو رقيبو هيوادونو ته نږدې دي او جاسوسي ورته کوي له همدې وجې انګلستان آزادي جبهه حمايه کوي او فرانسه او ځينې نور غربي هيوادونه مقاومت جبهه تمويلوي.
