د ریاستالوزراء اقتصادي مرستیال ملا عبدالغني برادر په مشرۍ د اقتصادي کمېسیون غونډه کې پرېکړه وشوه، چې په ابو نصر فراهي بندر کې دې د تخلیې او بارګیرۍ او اړوندو ادارو لپاره ۴۰۰۰ جریبه ځمکه ځانګړې شي.
اقتصادي معاونیت په یوه خبرپاڼه کې ویلي، چې د کور او ښار جوړولو وزارت ته دنده سپارل شوې، تر څو د دغه بندر د پراختیا نقشه او ډیزاین چمتو او پر ټاکلې نېټه اړوندو ادارو ته د تطبیق په موخه وسپاري.
خبرپاڼه زیاتوي، په دې غونډه کې همداراز د خصوصي سکټور له لوري د غزني ولایت په مرکز کې د کرنې، اوبولګولو او مالدارۍ وزارت پر ځمکه د سړې خونې او جوسو کارخونې جوړولو پر طرحه هم له ارزونې وروسته تائید شوه.
د دې طرحې له مخې پر ۳۵ جریبه ځمکه د ۵۰۰۰ ټنه په ظرفیت سړه خونه او همدا راز د جوسو کارخونه جوړېږي، چې ۱۴۰ میلیونه افغانۍ پانګونه پرې کېږي.
ویل شوي، یادې پرېکړې د منظورۍ په موخه د سرپرست حکومت د مشرتابه دفتر ته استول شوې دي.