لیکوال: انجینر کمال داودزی
د شر او فساد ډله غم، اختناق او فساد خورولو ته جوړ دي؛ دوی فطرتاً له امن او هوساینې سره وران خلک دي.
د شر دا ډله نه خدای جل جلاله پېژني، نه پیغمبر صلی الله علیه وسلم پېژني، نه د دې عظیم ملت له عظمته ډک تاریخ پېژني، د ټولو ارزښتونو له هیبت او جلال څخه ناخبره ډله ده.
تېره ورځ ځینې ادعاوې مخ ته راغلې چې ګویا د کابل په هوایي ډګر توغندیز بریدونه شوي چې رسمي سرچینو څخه د رد او تائید معلومات مخ ته رانغلل خو جالبه خبره دا وه چې د ازادۍ په نامه یو غلام غورځنګ ددې پېښې مسولیت ومانه او د عطف نقطه په کې دا وه چې دوی ادعا کړې چې طالبانو له کاره لویدلې الوتکې جوړولې چې موږ پرې بریدونه وکړل.
زما ذهن د ٧٠ کلونو مخکې جګړو ته لاړ او هغه صحنه مې سترګو ته ودرېدله چې د نظار شوری یو قومندان یونس قانوني خپلو چریکانو ته قومنده کوي چې د مخابرو او برښنا ستنې ونړوي، زیربنايي بنسټونه په نښه کړي او ښارونو کې وېره خپره کړي.
د ازادۍ جبهه د تېر جمهوري نظام د دفاع وزارت لوی درستیز یاسین ضیاء جبهه ده؛ ضیاء د امریکا په رڼاګانو کې ورک دی خو په کابل یې راڼه څراغونه، هوايي ډګر او څو الوتکې نه دي پېرزو.
نوموړی هم د نظار شوری تربیه شوی چریکي قومندان دی، دده روزنه هم په ویر او وحشت شوې، د ابادۍ او ازادۍ د مفکورې په ضد تربیه شوی نظامي چریکي دی.
دا وطن هیڅ د کشالو او غمونو د وړلو توان نه لري، د جګړو او شرونو مجال په کې نشته، د نظام سیوری د خدای جل جلاله لوی نعمت وي بیا چې نظام په اسلامي خاوره هم اسلامي وي نو نُور علی نُور وي.
د شرعي نظام تر سپېڅلي سیوري لاندې د الهي احکامو د تنفیذ له برکته دا ځمکه له فساد او بې عدالتیو څخه رنځېږي؛ څوک د بیت المال پیسې، ځمکې، موټرې او منصبونه نشي غصبولای.
د شر او شرارت ډلې خو په کابل او ولایتونو کې ولاړه لُوټه نه ده پرېښې؛ د کابل په تیږو یې هم چریکانو د غصب ولکې لرلې او بیا یې د غصب دا سیمې په تور بازار کې خرڅولې.
په شېرپور د غټو زورورو ولګې ښخې وې؛ تېره ورځ هم طالبانو د دوستم لخوا غصب شوې ځمکه د غصب له ظلم راخلاصه او بیت المال ته یې ستنه کړه.
دا ظالمان چې هر چېرته قتل او غارت وشي په ډېر ویاړ د شرارتونو د مسولیت منلو ته ناست وي.
راځم خپلې اولې خبرې ته؛ ایا موږ د ښو موټرو، د ښو الوتکو، د ښه هوايي ډګر، د ښو سړکونو، پارکونو او تولیدي بنسټونو لایق نه یو؟ ولې مو د ابادۍ او ازادۍ خلاف د ظلم او بربریت توره راباستلې؟
ولې د خدای جل جلاله ددې نص چې الله تعالی فرمایي (وَلَا تَعَاوَنُواْ عَلَى ٱلۡإِثۡمِ وَٱلۡعُدۡوَٰنِۚ) معنی دا چې د ګناه په کار کې د چا سره تعاون او مرسته مه کوﺉ، نو تاسو ولې د ګناه ددې لوی جرم مسولیت منئ؟ او هغه خلک ولې ددې نص په مقابل کې درېږي چې د شرارت ډلې سره فزیکي، مالي او معلوماتي برخه کې تعاون کوي؟
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.