ارغوان وطنیار
نن یکشنبه چې د غبرګولي له شلمې نېټې سره سمون خوري، د کمال خان بند د توربینونو لوډټیسټ وشو چې بریالۍ نتیجه یې لرله، نوموړي توربینونه چالان شول چې په ترڅ کې یې دوه زره کیلو واټه بریښنا تولید شوه د بریښنا د بند ټول تأسیسات پرې روښانه شول.
د طلایي نهر ( د قوشتپي کانال) جوړیدل، د فراه د بریښنا پر بند باندې چټک کار، د شاه او عروس بند چارې بشپړېدل، د کابل د شهري انکشاف عملیات، د هیواد په ګوټ ګوټ کې د میوې د باغونو جوړیدل، د ځنګلونو جوړیدل، د ښکار ممنوعیت او سږکال د آب خیزۍ خوشبخته کال دا ټول د خدای جل جلاله لورینه ده، چې په افغان ځمکه یې د رحمتونو او برکتونو څادر غوړولی.
سږ کال د آسمان ځولۍ څومره زرینه ډالۍ را پیرزو کړې، هغه دې شاعر خبره:خدایه مننه له تا ډېره ډېره جیب دې خالي او زړه دې مست راکړ زموږ خو لخیره سیندونه په ډکیدو دي، حاصلات په ښه کېدو دي، صادرات مو په لوړېدو دي او عایدات مو په ډېرېدو دي، زمونږ به هم لخیره د غلې کندوان ډک وي، هم به مو جیبونه ډک وي او هم به زړونه مست وي.نو سړی له خدایه څه وغواړي؟خو همدا د شکرانې تندی په ځمکه ایښودل پکار دي.
خدای جل جلاله وايي: زما په نعمتونو شکر وباسئ چې درته پریمانه یې کړم.دا باغ دې خدای داسې غني کړي چې مونږ ووایو:ستا د ښایست ګلونه ډیر ديځولۍ مې تنګه زه به کوم کوم ځایومهراځئ په ګډه یوه ابراهیمي دعاء وکړو، حضرت ابراهیم علیه السلام خپل وطن ته دعاء وکړه چې اې خدایه! زما وطن د امن وطن کړې ددې ځای خلک په میوې او دانې ماړه کړې او آخرت کې یې هم په ښو خلکو کې وشمیرې.
زموږ نو څه ځي چې مُلا مو پر منبر هره جمعه او د هرې جمعې په خطبې یوه رنګینه دعاء وکړي؟زمونږ څه ځي چې معلم مو د تورې دړې له څنګه د وطن یوه جانانه مینه د وطن د بچیو په زړونو کې وکري.
او وايي: که وطن دی که جانان یو مو روح دی بل مو ځان.
زمونږ ادکه او مورکۍ وطن ډېره مهربانه ده، مونږ که څه هم ډېر دردونه ورکړي مګر مونږ ته یې خوږه ځولۍ کې د میدان وردګو مڼې، د کندهار انار، د شینوارو زردالو، د شمالي انګور، د لغمان سبزي، د هلمند د غنمو ډوډۍ راکړې، په خپلو لپو کې یې د سیندونو، کارېزونو او کانالونو خوږې اوبه راپیرزو کړي دي چې دا ټول شیان د آب حیات نعمتونه دي.
وطنداره! دا نعمتونه دې آب حیات شه، وطن کې ژوند وغواړه کټ مټ د ماشومانو په څېر، هغوی سختۍ نه پیژني ځکه ماشوم د مور سیوری لري.
موږ هم مور لرو هغه مور وطن دی راځئ هغه د کاروان صیب په قول یې پای ته ورسوو:
سيپارو کې د ژوند بلبلان بلبلان وايي وي دې ودان دا وطن د افغان