لیکوال: محمد فیصل
له افغانستان څخه وتلی شر او فساد چې ځان ته د مقاومت جبهه وایي، په تېرو دریو کلونو کې یې د اتحاد ساتلو او په سیمه ییزه او نړیواله کچه د ملاتړ ترلاسه کولو له پاره ډېرې هلې ځلې وکړې، خو تر دې دمه ناکام شوي دي.
د دوی تر منځ یوه ستونزه خپلمنځي اختلافات دي چې هره ورځ یې خبرونه راځي او تر منځ یې د اتحاد هڅې ناکامېږي.
د عبدالرشید دوستم، عطا نور، محمد محقق او نورو تر منځ د نظر او ګټو اختلاف هغه څه دي چې دوی یې د ا.ا.ا پر ضد یو کولو ته پرېښي نه دي او له دریو کلونو تېرېدو وروسته لا هم پاشلي دي.
په یو بل تورونه لګول او پخوانۍ دښمنۍ تازه کول هغه څه دي چې د دوی تر منځ یې اتحاد ناشونی کړی او په ریښتیني ډول یې د یوې مقاومت ډلې جوړولو مخه نیولې ده؛ د دوی تېر تاریخ ته په کتلو د دوی تر منځ اتحاد ناشونی بریښي.
بل هغه څه چې دوی یې ناهیلي او ناکام کړي هغه په سیمه ییز او نړیواله کچه د ملاتړي نه موندل دي.
د مرکزي اسیا ټوله توجه د سیمې اقتصادي نښلون ته ده او له ا.ا.ا سره یې نږدې سفارتي اړیکې جوړې کړي دي.
ایران هم د تېر برعکس له شر او فساد لاس اخیستی او له ا.ا.ا سره یې نږدې اړیکې جوړې کړي دي؛ ایران اوس په منځني ختیځ کې هم ډېر بوخت دی.
که پاکستان ته ګورو، په تېر کې له شر او فساد سره د نږدې اړیکو او همکارۍ تاریخ نه لري او تمه هم نه کېږي چې پاکستان به د شر و فساد ملاتړ وکړي؛ خو د ځینو راپورونو او د ا.ا.ا د ویاند ذبیح الله مجاهد له څرګندونو داسې ښکاري چې پاکستان د داعش په ملاتړ په افغانستان کې ګډوډي جوړوي.
په نړیواله کچه که وګورو نو امریکا او نږدې متحدین یې په اوکراین او منځني ختیځ کې ډیر بوخت دي او وضعیت ته په کتلو داسې ښکاري چې دغه دوه بحرانونه به ژر حل نه شي او لویدیځ به تر ډیره هلته بوخت پاتې شي.
امریکا او نورو هیوادونو دا هم په ځلونو ویلي چې د ا.ا.ا د وسله والو مخالفینو ملاتړ نه کوي؛ په دې ډول څرګندیږي چې شر او فساد په سیمه ییزه او نړیواله کچه یوازې دی او د ا.ا.ا پر ضد د جګړې هیڅ توان او ملاتړی نه لري.
اوس نو شر او فساد ته له غلي کښېناستو او تسلیمۍ پرته بله لاره ورپاتې نه ده؛ ښه خبره به دا وي چې شر او فساد له انلاین اخطارونو او خپل وخت ضایع کولو لاس واخلي او افغانستان کې په ارامه فضا کې ژوند تېرولو له پاره راشي او پاتې ژوند په عزت په خپل هیواد کې تېر کړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
