رویټرز خبري اژانس راپور ورکړی، چې د د وینزویلا په لوېدیځ کې د وروستیو دوو زورورو زلزلو له امله د وژل شویو کسانو شمېر ۲۹۵۴ ته رسېدلی، په داسې حال کې چې زرګونه نور ټپیان او بېکوره شوي دي.
رویټرز د وینزویلا د چارواکو په حواله زیاتوي، چې په دې طبیعي پېښه کې له ۱۲ زرو ډېر کسان ټپیان شوي او شاوخوا ۱۶ زره نور د خپلو مېنو پرېښودو ته اړ شوي دي.
دغه دوه پرلهپسې زلزلې د جون په ۲۴مه د وینزویلا په لوېدیځ کې، د پلازمېنې کاراکاس شاوخوا ۱۶۰ کیلومترۍ کې رامنځته شوې. لومړۍ زلزله د ریښتر په کچه ۷.۲ او له هغې نږدې یوه دقیقه وروسته دویمه زلزله د ۷.۵ درجې په ځواک ثبت شوې ده.
د زلزلو له امله لسګونه ودانۍ نړېدلې، ګڼ کسان تر خاورو لاندې بند پاتې شوي او سړکونو، پلونو او نورو بنسټیزو تاسیساتو ته پراخ زیانونه اوښتي دي. د ژغورنې ډلې لا هم د ورکو شویو کسانو د موندلو او د زیانمنو سیمو د پاکولو عملیات روان ساتي.