کابل ښاروالي په يوه خپره شوې خبرپاڼه کې خبر ورکوي چې د ښاروالۍ د ودانیزو چارو مرستیال انجنیر عامر زمرک یاسر د سړک جوړونې له یو شمېر پروژو څخه د څارنې پر مهال پر قرادادي شرکتونو ټینګار کړی ترڅو خپل کارونه د تخنیکي سندونو او د کابل ښاروالۍ له خوا د چمتو شوي ډیزاین مطابق ترسره کړي.
خبرپاڼه کې راغلي چې د څارنې په لړ کې څرګنده شوه چې، د قراردادي شرکتونو له لوري د بادام باغ او له ده دانا څخه تر چهلستون پورې د سړکونو ځنې برخې په غیر معیاري او ټیټ کیفیت جوړې شوې دي چې، د ودانیزو چارو د مرستیال په لارښونه بېرته ویجاړې شوې او په معیاري توګه به بیا جوړې شي.
همدارنګه خبرپاڼه زياتوي چې د ودانیزو چارو مرستیال قراردادي شرکتونو ته په ټینګار سره وویل چې، د کارونو په ترسره کولو کې سرغړونې د کابل ښاروالۍ مشرتابه او کابل ښاریانو ته د منلو وړ نه دي او دا موضوع په جدي توګه څارل کیږي.
د نوموړي په وینا، د پروژو په کارونو کې د هر ډول سرغړونې په صورت کې به له قانوني چلند سره مخ شي او کابل ښاروالۍ به له دوی سره خپل قراردادونه فسخ کړي.
د خبرپاڼې پر بنسټ د يادې څارنې په ترڅ کې د ګل باغ سړک، له ده دانا څخه تر چهلستون پورې سړک، له پُل سوخته څخه تر پُل سرخ پورې سړک، د کمپنۍ- برچي سړک، د قرغې سړک، د کابل شمال- لوېدیځ لوی سړک، له امید سبزښارګوټي څخه تر عرفاني سړک او پر دوام یې تر قلعه قاضي پورې د سړک، او د بادام باغ سړک د جوړولو له چارو څخه څارنه شوې ده.
خبرپاڼه زياتوي چې انجنیر عامر زمرک یاسر ټینګار وکړ چې، د سړک جوړولو کارونه باید په پوره رښتینولۍ، ایماندارۍ او له ناغیړۍ پرته ترسره شي او قراردادي شرکتونه مکلف دي ترڅو د سړک جوړونې پروژې د ډیزاین له مخې، په ټاکلي وخت او ښه کیفیت سره د تخنیکي سندونو له مخې بشپړې کړي.
