سکای نیوز راپور ورکړی، چې د پاکستان تر ولکې لاندې کشمیر کې د پاکستاني رژیم ضد لاریونونو او تاوتریخوالي له امله لږ تر لږه ۲۴ کسان وژل شوي او لسګونه نور ټپیان شوي دي.
دا اعتراضونه د سیمې د پارلماني ټاکنو لپاره د ۱۲ ځانګړو څوکیو د ځانګړي کولو پر ضد پیل شوي او له تېرو دوو اوونیو راهیسې دوام لري.
ځایي پولیسو ویلي، چې د نښتو پر مهال څلور پولیس هم وژل شوي، ۹۷ نور ټپیان شوي او تر ۵۰۰ ډېر کسان نیول شوي دي.
د مسوولینو په وینا، د پاکستان پوځي رژیم د وضعیت د کنټرول هڅه کوي، خو په سیمه کې لا هم ترینګلتیا او اعتراضونه روان دي.