د جمهوریت له پرځېدلو وروسته پخوانیو غلو او ټوپکسالارانو چې عام ولس یې له ظلمونو تر پوزې پورې راغلی و، یو ځل بیا یې د جنګ او د وطن د ورانولو لار غوره کړه.
بهرنۍ رسنۍ تر ډېره د شر او فساد هغه تخریبي کړنو ته هوا ورکوي چې د وطن او ملت په خیر نه وي، د اسلامي او شرعي نظام پر وړاندې مشروع کړنې، عوامو ته نامشروع کوي، د شر او فساد د ډلو نامشروع کړنې مشروع کوي، ترڅو د عوامو ذهنیت ور واړوي.
دشر او فساد ډلو د خپلو تبلیغاتو لپاره د خپلو بادارانو په مالي امکاناتو د افغانستان انټرنیشل، زاویه نیوز، امو او ځينې نورې تخریبي رسنۍ پرانستې چې اوس مهال له هیواد بهر فعالیت/نشرات کوي.
هغه کوم ورانکاره فعالیتونه چې د دوی له خوا ترسره کېږي، د هغوی پړه هم په اسلامي امارت اچوي، ځانونه د همدې رسنیو له لارې سپین چرګان معرفي کوي، غواړي چې ددې کړنو یا فعالیتونو په ترسره کولو سره په خلکو کې محبوبیت ترلاسه کړي؛ خو دوی په دې نه دي پوه چې افغان ولسونو ته یې دا چل او فریب هم افشا شوی، ځکه چې د شر او فساد یا د خیالي جبهو د غړو له اصلي څهرو پرده پورته شوې او په ښه رسمیت سره پېژندل شوي دي.
بغاوتګر/د شر او فساد ډلې په تاریخ کې دې هیواد ته وفاداره نه دي پاتې شوي، یوازې او یوازې یې وفاداري خپلو بادارانو ته ښودلې، د هغوی په اشارو او هدایت سره یې د وطن په ورانولو لاس پورې کړی، په مقابل کې یې په شنو ډالرو عیش او نوش کړی، اوس هم دوی په همغه پخواني فکر روان دي خوبونه ګوري.
بهرنۍ رسنۍ چې د خیالي جبهو افواهاتو ته انعکاس ورکوي، موخه یې ترې د ویرې او وحشت خورول دي چې د اسلامي امارت پر وړاندې خنډونه پیدا کړي، هیلې ووژني، په شرعي نظام بې باوري رامنځته کړي، د خلکو تېرایستل، د جبهو په نفعه ضد او نقیض تبلیغات کول، ترڅو اذهان مغشوش کړي.
رسنۍ چې اوس مهال د نړۍ له حالاتو د وګړو د خبراوي په موخه چټک رسنیز فعالیتونه کوي او د خلکو د ذهني تنویر لپاره هر اړخیزې خپرونې چمتو کوي او خلک د نړۍ له حالاتو خبروي، نو په کار ده چې رسنۍ داسې څه خپاره کړي چې د خلکو په ژوند مثبت تاثیرات ولري او عوام ښې لارې ته سوق کړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
