د مهاجرینو ستونزو ته د رسېدنې عالي کمېسیون دارالانشاء ویلي، چې د سهشنبې په ورځ د هېواد له بېلابېلو سرحدي لارو ټولټال ۵۳۶ راستنېدونکې کورنۍ، چې ۲۷۰۲ غړي لري، افغانستان ته راستانه او ثبت شوې دي.
د راپور له مخې، له دغو کورنیو څخه ۲۹۳ کورنۍ، چې ۱۶۸۶ غړي لري، بېلابېلو ولایتونو ته لېږدول شوې او د ترانسپورټ لګښت لپاره ورته مالي مرسته ورکړل شوې ده.
همداراز، له ۴۰۳ کورنیو سره نغدي مرستې شوې، راستنېدونکو ته روغتیايي، خوراکي او مخابراتي خدمات وړاندې شوي او ۴۸۷ سیمکارټونه هم پر هغوی وېشل شوي دي.