د پنجشېر ولایت د رسنیو دفتر په یوه خبرپاڼه کې ویلي دي، چې د کانونو او پټرولیم ریاست د روان کال په لومړیو پنځو میاشتو کې له ۸.۱ میلیونه افغانیو څخه زیات عواید راټول او د دولت خزانې ته سپارلي دي.
خبرپاڼه زیاتوي، چې د کانونو او پټرولیم ریاست د روان کال په لومړیو پنځو میاشتو کې ۸ میلیونه، ۱۸۷ زره او ۵۶۷ افغانۍ عواید راټول کړي او د دولت خزانې ته یې لېږدولي دي.
د معلوماتو له مخې، دغه عواید د زمردو د ۱۰ سلنې امتیاز او د کانکېندونکو د کارتونو د وېش له درکه ترلاسه شوي دي.
خبرپاڼه کې راغلي، په پنجشېر کې د کانونو د مدیریت، څارنې او قانوني استخراج بهیر روان دی او د مشرتابه د هڅو په پایله کې د بېلابېلو کانونو د تثبیت او قانوني استخراج ساحه هم پراخه شوې ده.