د ریاستالوزراء اقتصادي معاونیت په یوه خبرپاڼه کې ویلي، چې د ریاستالوزراء اقتصادي مرستیال ملا عبدالغني برادر اخوند د ترکیې له سفیر سادین آیلدز سره په لیدنه کې د دواړو هېوادونو ترمنځ د اقتصادي، سوداګریزو او ټرانزیټي اړیکو پر پراختیا او په ترکیه کې د افغان کډوالو د ستونزو پر حل خبرې کړې دي.
ملا عبدالغني برادر اخوند په افغانستان کې د ترکي شرکتونو د پانګونې ستاینه کړې او له نورو ترکي پانګوالو یې هم غوښتي، چې په افغانستان کې پانګونه وکړي؛ نوموړي ډاډ ورکړی چې افغان حکومت به ورته لازمې اسانتیاوې برابرې کړي.
په دې لیدنه کې د افغان کډوالو لپاره د اسانتیاوو پر رامنځته کولو هم ټینګار شوی. د ترکیې سفیر ویلي، هېواد یې چمتو دی چې له افغانستان سره د ترانسپورټ، ترانزیټ، روغتیا، زدهکړو او نورو اقتصادي برخو کې خپلې اړیکې پراخې کړي.
سادین آیلدز همدارنګه ویلي، چې ترکیې افغانانو ته د ویزو په ورکړه کې اسانتیاوې رامنځته کړې او هڅه کوي چې په دې برخه کې لا نور سهولتونه هم برابر کړي.