د امریکا ولسمشر ډونالډ ټرمپ ویلي، چې د ایران او امریکا ترمنځ د جګړې د پای ته رسولو موافقه شوې ده او په ورته مهال د ایران دولتي تلویزیون هم دا خبر خپور کړی دی. ټرمپ پر خپله ټولنیز شبکه ټروت سوشیل یوه پوسټ کې لیکلي: «د ایران د اسلامي جمهوریت سره موافقه اوس بشپړه شوې ده، ټولو ته مبارکي.»
په همدې مهال د ایران د بهرنیو چارو وزارت مرستیال غریب زاده د دغې هوکړې په اړه ویلي «دغه تفاهملیک پر دښمن د باور په مانا نه دی، بلکې په بشپړې بې باورۍ کې لیکل شوی دی، موږ به د امریکا د ژمنو پر عملي کېدو څارنه وکړو، کوم دښمن چې د خپلو شومو موخو د عملي کولو لپاره برید کړی و، په ټولو موخو کې له ماتې سره مخ شو او د ایران اسلامي جمهوریت په جګړه کې لویې بریاوې ترلاسه کړې، تفاهمنامې په مسوده کې مو خپل ټول مهم دریځونه ځای پر ځای کړي دي، له نن شپې څخه د ایران پر وړاندې د امریکا د سمندري کلابندۍ (محاصرې) پای ته رسېدل پیلیږي، په بېلابېلو جبهو او په لبنان کې د جګړې او پوځي عملیاتو سمدستي او دایمي پای همدا نن شپه اعلانیږي، د تفاهملیک متن وروستی شوی او د اسلاماباد د تفاهملیک رسمي لاسلیک به د جمعې په ورځ په سویس کې ترسره شي.»
د دغې هوکړې هرکلی په نړیواله سطحه شوی، چې په لړ کې یې د ملګرو ملتونو سرمنشي انتونیو ګوترېش د امریکا او ایران ترمنځ هوکړې ته په رسېدو مبارکي ويلې او دغه هوکړه یې د سوله ييز حل لپاره مهم ګام بللی دی.
د برېټانیا او جرمني لومړي وزیرانو کییر سټارمر او میرڅ او د فرانسې ولسمشر مکرون هم د یادې هوکړې هرکلی کړی او د څو هېوادونو د هڅو یوه ډېپلوماټیکه لاسته راوړنه یې بللې.
د ترکیې ولسمشر اردغان او خارجه وزیر هاکان فیدان ویلي، چې د امریکا او ايران ترمنځ شوې هوکړې ته په خپله سیمه کې د سولې او ارامۍ د ټینګښت په لاره کې د یوه مهم پرمختګ په توګه ګوري او په پوره خوښۍ سره یې هرکلی کوي.
د قطر خارجه چارو وزارت ویلي، چې د دغه تفاهملیک پر سر هوکړه د سیمهییز ثبات او د اوږدمهاله سولې د پیاوړتیا په لور یو مهم پرمختګ دی او له دواړو لورو یې د خبرو اترو له لارې د اختلافاتو د حل هڅې ستایلي دي.
برېټانیا، فرانسې، جرمني او اېټالیا له دغې موافقې وروسته ویلي، دوی چمتو دي چې د ایران له خوا د اټومي وسلو د نه تر لاسه کولو په ځواب کې پر ایران لګیدلي بندیزونه لرې کړي. دغو هېوادونو په یوه ګډه اعلامیه کې ویلي، چې ایران باید هیڅکله اټومي وسلې ترلاسه نه کړي او دوی چمتو دي چې د دې هدف د ترلاسه کولو لپاره له امریکا، ایران او د اټومي انرژۍ له نړیوالې ادارې سره همغږي وکړي.