انادولو خبري اژانس راپور ورکړی، چې د حماس د پوځي څانګې «کتائب القسام» د خانیونس لواء قوماندان محمد عبدالسلام الیازوري د اسرائیلي رژیم د ځواکونو په هوايي برید کې شهید شوی دی.
د انادولو اژانس د راپور له مخې، کتائب القسام د جمعې په ورځ د الیازوري شهادت تایید کړی او ویلي یې دي، چې نوموړی د پنجشنبې په ماښام د اسرائیلي رژیم ځواکونو په یوه برید کې شهید شوی.
القسام ویلي، الیازوري د دغې لواء په بېلابېلو مهمو پوځي مسؤولیتونو کې دنده ترسره کړې وه، چې د خانیونس د کنډک قومانده او د لواء استخباراتو مسؤولیت هم پکې شامل وو. نوموړي د «طوفان الاقصی» عملیاتو په پلان جوړونه کې هم مهم رول درلود او تر دې وړاندې د لواء مرستیال قوماندان پاتې شوی و.
بلخوا، اسرائیلي پوځ هم د الیازوري د شهادت خبر تایید کړی او ویلي یې دي، چې هغه د خانیونس په سیمه کې په یوه هدفي هوايي برید کې په نښه شوی دی. د انادولو د راپور له مخې، په دغه برید کې درې فلسطینیان شهیدان او پنځه نور ټپیان شوي دي.