لیکوال: محمد کلیوال
دا طبعي خبره ده چې د هري زمانې هر حکومت مخالفین درلودل/لري؛ دوی کله یو کس وي، کله یو تنظیم وي او کله کله بیا د یو هیواد شکل ځانته غوره کوي.
مخالفین د هدف په اساس هم سره توپیر لري؛ دوی د بېلابېلو ارزښتونو لپاره مخالفت کوي چې ځیني یې مشروع وي او ځینې نامشروع.
په اوس وخت کې د افغانستان حکومت د غوڅ اکثریت ملاتړو تر څنک یو شمیر مخالفین هم لري چې ډېری یې په بهر کې دي؛ د مقاومت جبهه او د آزادۍ متحده جبهه دوه د شر او فساد هغه ډلې دي چې د افغانستان حکومت په مخالفت کې ځانونه تر ټولو وړاندې بولي.
دوی په افغانستان کې د شر او فساد جوړولو لپاره له مختلفو لارو کوښښ کوي چې ځینې خو یې د مسلح مقاومت خبره هم کوي مګر د افغانستان ډاډه امنیت یې یاده ادعا دروغ ثابتوي.
مقاومت جبهه او د آزادۍ جبهه د افغان حکومت په وړاندې د مخالفت نغارې ډنګوي، مګر د دوی تر منځ ډېر داسي موارد شته چې د دوی خپلمنځي اختلافات په ډاګه کوي.
د دواړو جبهو غړي د ډیموکراسي له برکته په تېر کې د مختلفو سیاسي ګوندونو غړي وو چې د ګټو او اهدافو په اساس له یو بل سره په ګڼو مخالفتونو کې ښکېل وو.
دوی د ملي ګټو پر ځای شخصي ګټو ته لومړیتوب ورکوي او شخصي ګټې نو په طبعي ډول د افرادو تر منځ توپیر کوي، حتی که د یوې کورنۍ غړي هم وي خو شخصي ګټې یې له یو بل څخه مختلفې وي.
په همدې اساس له افغان حکومت سره د دوی مخالفت هم د شخصي ګټو پر بناء دی؛ یو شمیر یې په حکومت کې ونډه غواړي، ځیني د خپلو خارجي بادارانو په لمسون د ښځو او بشر غربي حقوقو ته مبارزه کوي او ځینې نور بیا د تېرو جنایتونو د پټولو لپاره غواړي ځان له محاکمه کولو څخه وژغوري.
نصرت اقبال آزادي جبهې ته منسوب کس په دې وروستیو کې له ځینو هغه رازونو پرده پورته کړې چې د شر او فساد د ډلو(مقاومت جبهه او آزادۍ جبهه) تر منځ د یو لړ ژورو اختلافونو څرګندونه کوي.
د نصرت اقبال ادعا دا په ډاګه کوي چې د افغان حکومت مخالفین په خپلو منځو کې هم سره متحد نه دي او نه به هیڅکله سره متحد شي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
