د کډوالو او بیرته راستنېدونکو چارو وزارت په یوه خبرپاڼه کې ویلي، چې د دغه وزارت وزیر مولوي عبدالکبیر د کډوالو په چارو کې د ملګرو ملتونو د عالي کمېشنرۍ له رئیس عرفات جمال سره د افغان کډوالو د ستونزو د حل، د جبري ایستلو د مخنیوي او له کوربه هېوادونو سره د ګډو ناستو په اړه خبرې کړې دي.
په خبرپاڼه کې راغلي، چې مولوي عبدالکبیر د افغان کډوالو د ستونزو د هواري لپاره درې اړخیزې او څلور اړخیزې ناستې مهمې او اغېزناکې بللي او ویلي یې دي، چې افغان حکومت د کډوالو د ستونزو د حل په موخه له ټولو اغېزناکو هڅو او همکاریو ملاتړ کوي.
په همدې حال کې، عرفات جمال ویلي، ټاکل شوې د راتلونکې اکتوبر میاشتې په ترڅ کې په سویس کې د یوې نړیوالې غونډې په څنډه کې د افغان کډوالو د ستونزو او د جبري ایستلو په اړه خبرې وشي. نوموړي زیاته کړې، چې له ایران سره د افغان کډوالو د ستونزو د حل په موخه د ملګرو ملتونو، ایران او افغان حکومت ترمنځ د درې اړخیزې ناستې پر جوړېدو هم سلا شوې او ټاکل شوې دغه ناسته په نږدې راتلونکې کې په کابل کې ترسره شي.
د ملګرو ملتونو د عالي کمېشنرۍ رئیس همدارنګه ویلي، چې دغه سازمان د افغان کډوالو د ستونزو د حل او ملاتړ لپاره هڅې پیل کړې او د اړینو مالي امکاناتو د جلب لپاره یې پلان چمتو کړی دی.