دوهمه او وروستۍ برخه (۲)
د احمدشاه مسعود له وژلو وروسته د شر او فساد رېښې ختمې نه شوې، د دوی د نه ختمېدلو یو څو دلایل وو، یو دلیل یې دا وو چې احمدشاه مسعود په خپله داسې خلک وروزل چې له ده هم ډېر مکار او وطن فروش وو، دوهم یې دا چې د ده د وژل کېدو وروسته امریکا صحنه کې موجوده وه او هغوی ټول واک د همدې فسادیانو په نوم ووېشلو، چې په دې سره دا ډله نوره هم وپړسېده.
دوی ته د امریکا له لورې ځینې پروژې ورکړل شوې چې په هغې کې دوی ته ډېرې پیسې پاتې کېدلې او دوی د افغانستان په جګړه کې میلیونران شول؛ له تېرو درېیو کالونو را په دېخوا د شر او فساد ډلې په خارج کې عجیب او غریب فعالیتونه او ډېرې نادرې لري.
د شر او فساد ډله چې په هدف کې یوه ده، بیا دا خیالي جبهې ولې جدا_جدا دي!؟ مونږ د دوی د تاریخ په ټولو بابونو کې دا لیدلي چې دوی د سودا لپاره په خپله ډله کې ډلې راپیدا کوي، تر څو وکولی شي په اسانۍ سره د هر استخباراتي سازمان د ګټو د خونديتوب لپاره ټټر ووهي.
خو په دې وروستیو کې دوی د پیسو پر سر د یو بل وژلو ته ناست دي، ډېری اسناد داسې افشاء شول، چې احمدمسعود د دوستم د وژنې پلانونه جوړ کړي وو، همدا ډول په خپله د مقاومت خیالي جبهې په داخل کې اختلافات اوج ته رسېدلي دي، چې له امله یې په میډیا کې ډېری هغه شواهد هم خپاره شول چې دوی پټ ساتلي وو.
د مقاومت په نوم خیالي جبهې سره د برطانیې او یو څو نورو غربي هېوادونو له لورې یو میلیون ډالر مرسته اعلان شوې چې پرې ټول نښتي او یو بل ته د ټوېټر په سپیسونو کې ښکنځل کوي.
برطانیه او نور هېوادونه دا پیسې د دې لپاره ورکوي، چې په افغانستان کې د جګړې ور پرانېزي او داسې یو حالت رامنځته کړي، چې د وینو لښتي پکې وبهېږي؛ دوی چې د وطن له خزانو میلیاردونه ډالر وتښتول خو پرې ماړه نه شول او د شر جوړولو لپاره په یو ملیون ډالرو اوس د یو بل وژلو ته چمتو ناست دي.
پایله!
د شر او فساد ډله د وطن په ټنډه هغه داغ دی، چې تر نننۍ ورځې ترې د وطن ټول وجود نارامه او خوږمن دی، دوی د ارزښتونو په لیلامولو او وطن په خرڅولو کې دومره ماهر وو/دي، چې پردي خلک یې په زور دې خاورې ته را وغوښتل چې راشئ دلته وینې وبهوئ، هېواد تجزیه او ټوټه کړئ او ټول ارزښتونه لیلام او سپک کړئ.
فسادیان د دین او وطن اصل دښمنان او بربادونکي دي، چې اوس هم په ټول قوت هڅه کوي، چې په هېواد کې قومي تعصب ته لمن ووهي او د دوی د پلار احمدشاه مسعود لخوا د بل شوي اور مړې سپرغۍ بیا را تازه او د هېوادوالو ارام ژوند لمبه کړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
