په ۲۰۲۱ کال کې واک ته د طالبانو له رسېدلو وروسته د شر او فساد مشرانو ډېره هڅه وکړه چې د ا.ا.ا پر ضد وسله واله جګړه وکړي او افغانستان یوې بلې کورنۍ جګړې ته بوځي، خو طالبانو فرصت ور نه کړ.
طالبانو یوه هوښیاري دا وکړه چې پنجشیر یې په لومړیو کې ونیوه او شر و فساد ته یې په افغانستان کې دومره فرصت ور نه کړ چې یوه لوېشت ځای په خپل واک کې راولي او داسې منډه یې ورکړه چې ګردونه یې لا نه ښکارېدل.
له شړل کېدلو وروسته هغوی ډیره هڅه وکړه چې د مرکزي اسیا د هیوادونو په مرسته په افغانستان کې ګډوډي جوړه کړي، خو هغو هیوادونو یې ملاتړ و نه کړ او ناهیلي یې کړل.
د مرکزي اسیا هیوادونو له ا.ا.ا سره نږدې اړیکې جوړې کړې او په افغانستان کې له لسیزو وروسته راغلی ثبات یې د خپل پرمختګ له پاره یو چانس وګاڼه.
ازبکستان له مخکې څخه له طالبانو سره نږدې اړیکې درلودې او په وروستیو درې کلونو کې مو ولیدل چې د ازبکستاني لوړ پوړو چارواکو په ځلونو افغانستان ته د سیاسي_اقتصادي اړیکو جوړولو له پاره سفرونه وکړل.
دغه راز، قزاقستان یو لوی ګام دا واخیست چې طالبان یې د ترهګرو ډلو له لیست څخه بهر کړل.
ترکمنستان هم له طالبانو سره خوږې اړیکې جوړې کړي او د طالبانو په تړاو یې خپله دایمي بې طرفي پالیسي ساتلې ده.
د ټاپي پروژې د دوهم پړاو پیل او د ترکمنستاني چارواکو اخلاص په دغه برخه کې د پام وړ دی.
د دې تر څنګ، موده وړاندې د تاجکستان ځینې چارواکي هم کابل ته د خبرو له پاره راغلي وو؛ تاجکستان په مرکزي اسیا کې یوازینی هیواد و چې شر و فساد ورته ډېره هیله درلوده، خو په وروستیو کې دوی هم ناهیلي کړل او ښکاري چې له تاجکستانه د شر و فساد تمه شکېدلې او یوازې انلاین غونډې او اخطارونه ورپاتې دي.
د ا.ا.ا په تړاو د مرکزي اسیا د هیوادونو پالیسۍ ته په کتلو دا ثابته شوه چې هغه هیوادونه نور په افغانستان کې کورنۍ جګړه نه غواړي، د شر او فساد ملاتړ نه کوي؛ خپل ثبات او اقتصادي ښیرازي د افغانستان په ثبات کې لټوي.
یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش غږ توافق ورسره شرط نه دی.
