بهرنیو چارو وزارت د يوې خبرپاڼې په خپرولو سره وايي، چې د دغه وزارت سرپرست وزير مولوي امیرخان متقي نن په کابل کې د بندیانو په چارو کې د امریکا د ولسمشر، ډونالډ ټرمپ له ځانګړي استازي اډم بوايلر او د افغانستان لپاره د امریکا له پخواني ځانګړي استازي، زلمي خلیلزاد سره کتلي دي او د دواړو هېوادونو ترمنځ په دوه اړخيزو اړيکو خبرې شوې دي.
د سرچينې په وينا، په دغه کتنه کې د دواړو لورو ترمنځ د بندیانو پر تبادلې او مثبتو دوه اړخیزو اړیکو په اړه خبرې کړې دي او ښاغلي متقي ټينګار کړی چې سرپرست حکومت د متوازن سياست په رڼا کې له ټولو لوريو سره مثبتې اړيکې غواړي.
خبرپاڼې همدا راز زیاته کړې، چې په دغه کتنه کې امريکا کې افغانانو ته د کونسلي خدمتونو وړاندې کولو په اړه هم خبرې وشوې.
سرچينه زياتوي چې د بندیانو په چارو کې د امریکا استازي، بوایلر د افغانستان او امريکا ترمنځ د بنديانو برخه کې پرمختګ د باور جوړونې پر لور ښه ګام بللی دی.
