له پېښو سره د مبارزې امادهګۍ ادارې مرستیال ویاند قاري تاج محمد همت ویلي، چې د نورستان ولایت په مرکز پارون کې د وروستیو سختو سېلابونو له امله لږ تر لږه ۲۳ تنه شهیدان شوي، ۸۰ تنه ټپیان او شاوخوا ۱۰۰ کسان لا هم نادرکه دي.
د همت د معلوماتو له مخې، پرون په نورستان ولایت کې راغلو سختو سېلابونو خلکو ته درانه ځاني او مالي زیانونه اړولي او د لومړنیو معلوماتو له مخې تر اوسه د ۱۵ کسانو جسدونه موندل شوي او شاوخوا ۱۰۰ کسان لا هم نادرکه دي، چې د ژغورنې ډلې یې د موندلو هڅې کوي.
نوموړي زیاته کړې، چې سېلابونو د استوګنې او سوداګریزو ودانیو ترڅنګ عامه شتمنیو ته هم پراخ زیانونه اړولي دي. د معلوماتو له مخې ۷ کورونه په بشپړ ډول ویجاړ شوي، ۲۳ نور کورونه نسبي زیانمن شوي دي.
دغه راز ۱۱ هوټلونه هم په بشپړ او نسبي ډول ویجاړ شوي، ۷۰ هټۍ له منځه تللي او ۴۰ عرادې غټ او واړه وسایط زیانمن شوي دي.
له پېښو سره د مبارزې امادهګۍ ادارې ویلي، چې یاد ارقام لومړني دي او د ژغورنې، پلټنې او ارزونې له دوام سره ښایي بدلون ومومي.