عدلیې وزارت په یوه خبرپاڼه کې ویلي، چې د مرکزي زون د امارتي غصب شویو ځمکو قضیو ته د رسېدنې اختصاصي محکمې د پکتیکا ولایت په یوسف خېلو ولسوالۍ کې د ۱۵ زره او ۲۷ جریبه ځمکې په اړه، د اسنادو، املاکي ثبوتونو او اړوندو معلوماتو له ارزونې وروسته پرېکړه کړې، چې یاده ځمکه امارتي ملکیت دی.
د وزارت د معلوماتو له مخې، یاده ځمکه د یوسفخیلو ولسوالۍ د مېست کلي په شاوخوا اووه کیلومترۍ کې موقعیت لري.
محکمې د متصرفینو او کمېسیون اسناد، املاکي دفترونه او د اړوندو ادارو معلومات ارزولي او حکم یې کړی، چې یاده ټوله ځمکه «بلندآبه» او امارتي ملکیت دی. متصرفین مکلف دي، چې ځمکه اړوند کمېسیون ته وسپاري.