د هغو مالوماتو له مخې چې له باوري سرچینو څخه هندوکشغږ ته رسېدلي، څه موده وړاندې د عطامحمد نور او د پاکستان د استخباراتي سازمان (آیاسآی) د چارواکو ترمنځ یوه محرمه لیدنه ترسره شوې ده.
په دې اطلاع کې ذکر شوي چې عطامحمد نور په دې لیدنه کې له آیاسآی څخه د ۱۰۰ میلیونو ډالرو غوښتنه کړې وه، خو د پاکستان لوري لخوا دا غوښتنه رد شوه. د دغو سرچینو د ادعا له مخې، د دې وړاندیز د رد کولو دلیل دا و چې آیاسآی له دې وړاندې د یاسین ضیا او احمد مسعود سره د افغانستان پورې اړوند یوه پروژه کې هوکړې ته رسېدلی و او له عطامحمد نور څخه یې غوښتي و چې د همدې پروژې په چوکاټ کې فعالیت وکړي.
د همدې روایت له مخې، عطامحمد نور دا چلند د خپل ځان په حق کې یو ډول سپکاوی او تحقیر وګاڼه او د دې طرحې له همکارۍ یې خپله نارضایتي څرګنده کړه.
د دې اطلاع په دوام کې ویل شوي چې د دې پېښې وروسته او له پاکستان څخه د ناامیدۍ په پایله کې، عطامحمد نور اوس د یاسین ضیا او احمد مسعود پورې تړلې جبهې د «پاکستان نیابتي ملیشې» او «پروژهاي جنګسالاران» بولي.