بهرنیو چارو وزارت ویلي، چې هېوادوالو ته د کونسلي خدمتونو د لا اسانتیا په موخه به د ولایتونو له مرکزونو وروسته، په لسو ولسوالیو کې د سندونو د تصدیق خدمتونه هم پیل کړي.
د یاد وزارت د خبرتیا له مخې، دغه خدمتونه به د کابل په سروبي او قرهباغ، د کندهار په سپینبولدک، د هرات په شینډنډ، د بلخ په کلدار (حیرتان)، د ننګرهار په مومندرې (تورخم)، د هلمند په ګرشک، د کندوز په امام صاحب، د غزني په جاغوري او د پکتیا په څمکني ولسوالیو کې وړاندې کېږي.
بهرنیو چارو وزارت ویلي، هېوادوال کولی شي د روان کال د زمري میاشتې له لومړۍ نېټې وروسته خپل اسناد د افغان پوسټ شرکت له لارې د یادو ولسوالیو د څانګو له لارې د تصدیق لپاره واستوي او له تصدیق وروسته یې له هماغو پوسټخونو ترلاسه کړي.