د جمهوريت پر مهال د دفاع وزارت مرستيال تميم عاصي په تازه څرګندونو کې ويلي، چې پاکستان له هېواده بهر د رسنیو د یوې پېچلې شبکې، د انجوګانو فعالانو، د ښځو حقونو تش په نوم فعالانو او لږ تر لږه د افغانستان د دوو سیاسي استازولیو له لارې د رواني جګړې یوه پراخه ماشین تمویلوي.
د نوموړي په خبره دغه شبکه او اړوند کسان د څو میلیونو ډالرو، د پاکستان د ویزو سهمیې، اروپایي پلازمېنو ته د سفر لګښتونو او د پاکستان په دوو ښارونو کې د مېلمستونونو او دفترونو په بدل کې د افغانستان د ملي حاکمیت او ځمکنۍ بشپړتیا پر ضد یوه هر اړخیزه رواني جګړه پر مخ وړي.
تميم عاصي زياته کړې «له بده مرغه، د طالبانو ضد ځینې جبهې هم د افغانستان د تجزیې، قومي تفرقې او په بهرنیو محافلو کې د افغانستان د بدنامولو روایتونو ته لمن وهي، چې هدف یې افغانستان د کورنۍ جګړې پر لور سوق کول او د سوریې او سوډان په څېر حالت ته رسول دي.»
هغه ويلي کورني مخالفتونه بايد د سياسي تفاهم او خبرو له لارې حل شي؛ خو دا چې د خپل هېواد پر ضد د بهرنیو استخباراتو تر سیوري لاندې ودرېږو، د منلو وړ نه ده او ملي خیانت ګڼل کېږي.
نوموړي همدا راز ويلي، چې په راتلونکې لیکنه کې به د دې خطرناکې پروژې او رواني جګړې جزییات واضح کړي.