د کرنې، اوبولګولو او مالدارۍ وزارت په یوه خبرپاڼه کې ویلي، چې د یاد وزارت وزیر مولوي عطاءالله عمري د ۱۳ کسیز پلاوي په مشرۍ د افغانستان او بلاروس ترمنځ د اقتصادي او سوداګریزو همکاریو د ګډ کمېسیون په دویمه غونډه کې د ګډون لپاره بلاروس ته تللی دی.
د کرنې وزارت د خبرپاڼې په وینا، افغان پلاوي ته د بلاروس رسمي بلنه ورکړل شوې او په ترکیب کې یې د صنعت او سوداګرۍ وزارت مرستیال، د اړوندو وزارتونو استازي، د امارتي شرکتونو استازي او د ریاستالوزراء اقتصادي معاونیت استازي شامل دي.
پلاوی به له بلاروسي چارواکو سره د اقتصادي او سوداګریزو اړیکو د پراختیا، د ګډو همکاریو د پیاوړتیا او د نویو اقتصادي فرصتونو د رامنځته کولو په اړه خبرې وکړي.
ټاکل شوې، چې دغه سفر او د ګډ کمېسیون غونډه به پنځه ورځې دوام وکړي.